राष्ट्रिय परीक्षा बोर्डले गत बैशाख १४ गतेदेखि संचालन गरेको कक्षा १२ को नतिजा सार्वजनिक गरेको छ । आज सार्वजनिक गरेको नतिजा अनुसार परीक्षामा ५२.९१ प्रतिशत परीक्षार्थी उत्तीर्ण भएका बोर्डले जनाएको छ ।
बोर्डले कक्षा-१२ को परीक्षामा १ सय २२ जनाको परीक्षा रद्द गरेको जनाएको छ । बोर्ड बैठकले सार्वजनिक गरेको नतिजामा उक्त संख्यको परीक्षा रद्द गरिएको उल्लेख गरेको छ । त्यस्तै १२ हजार ६ सय ७२ जना सबै विषयको परीक्षामा अनुपस्थित रहेको जनाएको छ ।
गत वैशाख १४ गतेबाट सञ्चालित परीक्षामा ५ हजार ५ सय ४२ विद्यालयका १ लाख ९६ हजार ९ सय १४ छात्रा र १ लाख ९३ हजार ९ सय ३३ जना छात्र गरी ३ लाख ९० हजार ८ सय ४७ परीक्षार्थीहरु सहभागी भएका थिए ।
७७ वटै जिल्ला र जापानको एकसमेत गरी १ हजार ५ सय २६ केन्द्रमा परीक्षा सञ्चालन भएको परिक्षामा ग्रेड वृद्धितर्फ १ लाख ६ सय ५० विद्यार्थी सहभागी भएका थिए ।
