प्रसूति तथा स्त्री रोग अस्पतालको कुपण्डोलस्थित नयाँ भवन यथाशीघ्र सञ्चालन गर्न स्वास्थ्य तथा जनसङ्ख्या मन्त्री प्रदीप यादवले निर्देशन दिएका छन् । मन्त्री यादवले स्वास्थ्य मन्त्रालयका पदाधिकारीको टोलीसहित प्रसूति गृहको अनुगमन गर्दै नयाँ भवन पूर्णरुपमा सञ्चालन गर्न निर्देशन दिएका हुन् ।
मन्त्री यादवले नयाँ भवन पूर्णरुपमा सञ्चालन गर्न, शौचालयको राम्रो व्यवस्थापन गर्न, आउटरिच क्लिनिकको सेवा बढाउने लगायत निर्देशन दिँदै मन्त्रालयको तर्फबाट सहयोगको प्रतिबद्धता गरेको बताईएको छ । साथै, मन्त्री यादवले बच्चाहरूको शल्यक्रियाका लागि कान्ति बाल अस्पतालसँग शय्याका लागि समन्वय गर्न पहल गर्ने समेत उल्लेख गरेका छन् ।
प्रसूतिगृहको कुपण्डोलमा बनेको नयाँ भवनको गत फागुन २ गते उद्घाटन भइसकेको छ भने उक्त भवनमा ओपिडी सेवा, सुरक्षित गर्भपतन सेवा पाठेघरको क्यान्सरको जाँच, पिसाब चुहिने समस्या, टेष्टट्युव बेबीलगायतका सेवा प्रवाह हुने बताईएको छ । प्रसूति गृहको अनुगमनमा पुगेका मन्त्री यादवले पोस्ट न्याटल वार्ड, स्पेसल बेबी केयर युनिट, नवजात शिशु कक्ष, एनआइसियु, ह्युमन मिल्क बैँक कक्षहरू अनुगमन गरेका थिए ।
मन्त्रीसमक्ष नर्स इन्दिरा ढुङ्गेलले नर्सिङ जनशक्तिको अभाव भएका कारण दुई जना नर्सले ५२ जना आमाको हेरचाह गर्नुपरेको बताउँदै दरबन्दी बढाउन माग गरेको बताईएको छ । उक्त अस्पतालको ओपिडीमा हाल दैनिक ८ सयदेखि १ हजारसम्मले सेवा लिने गरेका छन् ।
