वैदेशिक रोजगारीमा ठगिनबाट जोगाउन श्रम तथा वैदेशिक रोजगारसम्बन्धी सही सूचनालाई व्यापक बनाउन श्रम, रोजगार तथा सामाजिक सुरक्षामन्त्री डोलप्रसाद अर्यालले जोड दिएका छन् । बाँकेको कोहलपुरमा रोजगार सेवा केन्द्रमा कार्यरत कर्मचारीको क्षमता अभिवृद्धि तालिमको उद्घाटन गर्दै मन्त्री अर्यालले उक्त कुरामा जोड दिएका हुन् ।

मन्त्री अर्यालले गाउँ-गाउँमा सही सूचना दिएर ठगिनबाट जोगाउन र स्वरोजगार हुन आवश्यक सहयोग गर्न सम्वन्धित पक्षलाई आग्रह गरेका छन् । उनले कार्यक्रमको ढाँचा परिवर्तन गरी सम्वन्धित पक्षलाई जिम्मेवार बनाएर इमानदारीका साथ काम गर्न आग्रह गरेका हुन् ।

लुम्बिनी प्रदेशले श्रम मन्त्रालयअन्तर्गतको प्रधानमन्त्री रोजगार कार्यक्रम संयोजकका लागि एक प्रशिक्षण कार्यक्रम शुरु गरेको छ । अन्तर्राष्ट्रिय श्रम सङ्गठनको प्राविधिक सहयोगमा मन्त्रालयले प्रशिक्षण कार्यक्रम शुरु गरेको हो ।

उक्त प्रशिक्षण कार्यक्रममा लुम्बिनी प्रदेशका २०४ जना रोजगार संयोजकको सहभागी रहेको र प्रशिक्षण कार्यक्रम २०८१ जेठ ७ गतेसम्म सञ्चालन हुने बताईएको छ ।