दोलखाको मेलुङ गाउँपालिका-१ पवटीमा मलामी बोकेको गाडी पल्टिदा १४ जना घाइते भएका छन् । शैलुङ गाउँपालिका-८ ढाँडे कुनेबाट मलामी र दाउरा बोकेर तामाकोशी तर्फ जादै गरेको बागमती प्रदेश ०१-०२६ च ९८१३ नम्बरको बोलेरो सत्यश्वर–सिम्टे सडक खण्डको भटमासेमा दुर्घटना भएको हो ।
उक्त दुर्घटनामा परी चालक हरिबहादुर कार्की सहित गाडीमा सवार सबै घाइते भएको र घाइते मध्ये ३ जना मात्रै होसमा रहेको घटनास्थलबाट प्रत्यक्षदर्शी बताएका छन् । घाइतेहरुको विवरण नखुलेको भएपनि उनीहरु शैलुङ-८ ढाँडे र मेलुङ आसपासका भएको बताइएको छ ।
ओरालो सडकमा क्षमता भन्दा बढी मानिस सवार भएकोले गाडी दुर्घटना भएको हुन सक्ने अनुमान गरिए पनि घटनास्थलमा प्रहरी नपुगेको कारण एकिन गर्न सकिएको छैन । दुर्घटना पछी स्थानीयबासीले घाइतेको उद्धार गरी सदरमुकाम चरिकोट तर्फ पठाइसकिएको स्थानीय पुरुषोत्तम पाठकले जानकारी दिएका छन् ।
