पश्चिमी वायु, स्थानीय वायु तथा भारतको बिहार आसपास बनेको न्यून चापीय प्रणालीको कारण नेपालको मौसम बदलीसंगै हल्का देखि मध्यम वर्षाको सम्भावना रहेको छ । हाल देशभर मौसम बदलीसंगै मधेश प्रदेश, बागमती प्रदेश र कोशी प्रदेशका थोरै स्थानहरूमा तथा गण्डकी प्रदेश र लुम्बिनी प्रदेशका एक-दुई स्थानहरूमा हल्का देखि मध्यम वर्षा भइरहेको छ ।
आज दिउँसो देशभर आंशिक देखि साधारणतया बदली रहने र देशको पहाडी भु-भागको केही स्थानहरूमा मेघगर्जन सहित चट्याङ्ग र हावाहुरीका साथै मध्यम वर्षाको सम्भावना रहेको छ । त्यस्तै तराईका एक-दूई स्थानहरूमा मेघगर्जन र चट्याङ्ग सहित हल्का वर्षाको सम्भावना रहेको मौसम पूर्वानुमान महाशाखाले जनाएको छ ।
दिउँसो देशका उच्च पहाडी तथा हिमाली भागका थोरै स्थानमा हल्का हिमपातको सम्भावना रहेको र राति देशभर आंशिक देखि साधारणतया बदली रहने छ । कोशी प्रदेश,मधेश प्रदेश, बागमती प्रदेश, गण्डकी प्रदेश र लुम्बिनी प्रदेशका थोरै स्थानहरूमा आंशिक देखि साधारणतया बदली हुने महाशाखाले जनाएको छ ।
त्यस्तै महाशाखाका अनुसार बाँकी प्रदेशका पहाडी भू-भागका एक-दुई स्थानमा मेघगर्जन सहित चट्याङ्ग र हावाहुरी आउनुका साथै मध्यम वर्षाको सम्भावना रहेको छ । कोशी, गण्डकी र कर्णाली प्रदेशका उच्च पहाडी तथा हिमाली भू-भागका एक-दुई स्थानमा हल्का हिमपातको सम्भावना समेत रहेको महाशाखाको भनाई रहेको छ ।