वैदेशिक रोजगारीमा जाने नेपाली श्रमिकहरूको हवाई टिकटमा खाना–खाजा तथा पानीको सुविधा हुने गरी उचित मूल्यको व्यवस्थापन गर्न वैदेशिक रोजगार विभागले आग्रह गरेको छ । नेपाली श्रमिकहरूको हवाई भाडा तथा सुविधाको उचित व्यवस्थापन गर्न सम्बन्धित निकायलाई आग्रह गरिएको हो ।
उडान समय भन्दा तीन घण्टा अगाडि नै विमानस्थलभित्र प्रवेश गर्नुपर्ने र मलेसिया तथा मध्यपूर्वका मुलुकमा वैदेशिक रोजगारीका लागि श्रमिकले औसतमा चार घण्टाको यात्रा तय गर्नुपर्ने हुदा नेपाली श्रमिकहरूको हवाई टिकटमा खाना–खाजा तथा पानीको सुविधा आवस्यक रहेको बताईएको छ ।
विभागले वैदेशिक रोजगारीमा जाने नेपाली श्रमिकहरूको हवाई भाडा तथा सुविधाको उचित व्यवस्थापन गर्न नेपाल नागरिक उड्डयन प्राधिकरण, वैदेशिक रोजगार व्यवसायी महासंघ र नेपाल एसोसिएसन अफ टुर एन्ड ट्राभललाई पत्राचार गरी आग्रह गरेको हो ।
विभागका महानिर्देशक डुण्डुराज घिमिरेका अनुसार घण्टौँको यात्रामा पनि श्रमिकले न्यूनतम खाना–खाजा तथा पानी समेत नपाउने गरेको गुनासो आउन थालेपछि विभागले सम्बन्धित निकायलाई डाकेर छलफल गरेको थियो ।