हिमाल पारीको जिल्ला मुस्ताङ भ्रमण तथा मुक्तिनाथ दर्शनका लागि गएका २९ जना आन्तरिक तथा बाह्य पर्यटकको लेक लागेर मृत्यु भएको छ । जिल्ला प्रहरी कार्यालय मुस्ताङका अनुसार आर्थिक वर्ष २०७८/७९ मा ६ जना, २०७९/८० मा १२ जना र चालु आर्थिक वर्षमा ११ जना गरि २९ जनाले ज्यान गुमाएका हुन् ।
यसरि ज्यान गुमाउनेमा सबैभन्दा धेरै भारतीय नागरीक २० जना रहेका छन् । त्यस्तै ७ जना नेपाली १ जना युक्रेन र १ जना थाइल्याण्डका नागरिकको लेक लागेर ज्यान गुमाएका हुन् । चालु आर्थिक वर्षको फागुनमा २ जना र चैत महिनामा ६ जनाको मृत्यु भएको जिल्ला प्रहरी कार्यालय मुस्ताङका प्रहरी नायव उपरीक्षक भोजराज पाण्डेयले जानकारी दिएका छन् ।
लेक लागेर ज्यान गुमाउनेमा अधिकांश ज्येष्ठ नगारिक रहेका छन् । पछिल्लो ३ वर्षको अवधिमा २१ जना ६० वर्षभन्दा बढी उमेरका नागरिकहरुको लेक लागेर ज्यान गएको छ । त्यस्तै ३ जना ४०–५० वर्ष उमेरका, ४ जना ५०–६० वर्ष उमेरका र २ जना ३०–४० वर्ष उमेर समूहका व्यक्तिको मृत्यु भएको जिल्ला प्रहरी कार्यालय मुस्ताङको तथ्याङ्कमा उल्लेख छ ।
समुद्री सतहदेखि ३ हजार मिटरभन्दा माथिको उचाइमा पुग्दा ज्येष्ठ नगारिकलाई समस्या हुने र त्यसले मृत्युसम्म हुन सक्ने स्वास्थ्यकर्मीहरु बताउछन । मुस्ताङका प्रमुख जिल्ला अधिकारी जनकराज पन्तले ट्राभल एजेन्सीहरु सँग पनि समन्वय र सहकार्य गरेर पर्यटकलाई मौसमसँग घुलमिल हुने वातावरण बनाउन आग्रह गरेका छन् ।