लुम्बिनी विकास कोषका योजना प्रमुख इन्जिनियर सरोज भट्टराईले घुस लिएर उनकी आमाका नाममा जग्गा किनेको भन्दै अख्तियार दुरूपयोग अनुसन्धान आयोगले भ्रष्टाचार मुद्दा दर्ता गरेको छ ।
आयोगले इन्जिनियर सरोजले गैरकानुनी सम्पत्ति कमाएको भन्दै उनकी आमालाई पनि आइतबार विशेष अदालतमा भ्रष्टाचार मुद्दा दर्ता गरेको हो ।
सरोजले उनकी आमा जनक नन्दनी भट्टराईको नाममा गुण्डुमा २–९–०–१ र ०–२–१–० क्षेत्रफल भएको जग्गा खरिद गरेको आयोगको आरोपपत्रमा उल्लेख गरेको छ । साथै,बिक्रेताको बैंक खातामा सरोजकै खाताबाट रकम जम्मा गरेको बैंक भौचरबाट देखिएको समेत आरोपपत्रमा उल्लेख छ ।
इन्जिनियर सरोजले लुम्बिनी विकास कोषमा ठेक्काको काम गर्ने निर्माण सेवाका प्रोप्राइटरसँग घुस मागेको आयोगको दाबी छ । सरोजले कोषमा ठेक्का पट्टाको काम गर्ने निर्माण सेवाका प्रोप्राइटरसँग घुस मागी आमा जनकनन्दनीको नाममा जग्गा खरिद गरेको आयोगको आरोप छ । आयोगले सरोजलाई ८० लाख रूपैयाँ बिगो, कैद सजाय, जरिवाना मागदाबी गरेको छ ।
आयोगले उक्त खरिद गरिएको जग्गासमेत जफतको लागि मागदाबी लिइएको छ भने सरोजकी आमालाई समेत मुख्य कसुरदार मान्दै ८० लाख रूपैयाँ बिगो, जरिवाना, कैद सजाय माग गर्दै विशेष अदालत काठमाडौंमा मुद्दा दर्ता गरेको छ ।
