![तीन विदेशीसहित २६ निर्माण कम्पनीलाई स्पष्टीकरण](/_next/image?url=https%3A%2F%2Fwww.nepaltoday.com.np%2Fbackend%2Fuploads%2Fkharid_anugaman_661c0811b7.jpg&w=3840&q=75)
सरकारले २६ वटा निर्माण कम्पनीलाई सम्झौता बमोजिम कार्यसम्पादन सन्तोषजनक नरहेको भन्दै स्पष्टीकरण सोधेको छ । ३ विदेशीसहित २६ वटा नेपाली निर्माण कम्पनीलाई सरकारले स्पष्टीकरण सोधेको हो ।
आज सार्वजनिक सूचना निकालेर प्रधानमन्त्री तथा मन्त्रिपरिषद कार्यालय मातहतको सार्वजनिक खरिद अनुगमन कार्यालयले कार्यसम्पादन सन्तोषजनक नभएका ३ विदेशीसहित २६ वटा निर्माण कम्पनीलाई कारबाही गर्नु नपर्ने कारणसहित सात दिन भित्र लिखित जवाफ पेश गर्न भनिएको छ ।
यसअघि ३० दिनभित्र स्पष्टीकरण दिन पत्र पठाउँदा पनि ती व्यवसायीले अटेर गरेपछि आज सार्वजनिक सूचना जारी गर्दै सात दिनभित्र लिखित स्पष्टीकरण माग गरेको हो ।
स्पष्टीकरण माग गरिएका २६ निर्माण कम्पनीमध्ये भारतका २ र चीनको १ अन्तर्राष्ट्रिय र बाँकी २३ वटा नेपाली कम्पनी रहेका छन् । उक्त कम्पनीहरुले दिएको स्पष्टीकरण चित्तबुझ्दो नभए सार्वजनिक खरिद अनुगमन कार्यालयले कालोसूचीमा राखी कारबाही गर्ने बताईएको छ ।