शिक्षा, विज्ञान तथा प्रविधि मन्त्रालयमा कार्यरत २० जना कर्मचारी हाजिर गरी बिना जानकारी कार्यालयबाट बाहिर गएको सम्बन्धमा स्पष्टीकरण सोधिएको छ । चैत १४ गते मन्त्रालयका विभिन्न महाशाखा तथा शाखामा गरिएको आन्तरिक छड्केमा ती कर्मचारी हाजिर गरी मन्त्रालयबाट बाहिरिएको पाइएकाले स्पष्टीकरण सोधिएको हो ।
चैत १४ गते हाजिर गरी बिना जानकारी कार्यालयबाट मन्त्रालयका विभिन्न महाशाखा तथा शाखाका २० कर्मचारी बाहिर गएको पाइएको जनाइएको छ । शिक्षामन्त्री सुमना श्रेष्ठको निर्देशनमा मन्त्रालयको प्रशासन शाखाबाट आन्तरिक छड्के गरिएको थियो ।
आन्तरिक छड्केमा कार्यकक्षमा नभेटिने तथा कार्यालय समयको पालना नगर्ने कर्मचारीलाई सोधिएको स्पष्टीकरण चित्तबुझ्दो नआए कानुनबमोजिम कारबाही हुने मन्त्री श्रेष्ठको सचिवालयले जनाएको छ ।
मन्त्रालयअन्तर्गतका विभाग तथा कार्यालयमा यस किसिमका अनुगमन तथा छड्के निरन्तररूपमा हुने र कार्यालय समयमा बिनाजानकारी अनुपस्थित हुने तथा तोकिएको जिम्मेवारी पूरा नगर्ने कर्मचारी माथि कानुनबमोजिम कारबाही हुने समेत जनाइएको छ ।
