गत माघ १० गते नेपाल सरकारले भिजिट भिसामा नयाँ मापदण्ड जारी गरेसँगै अहिले दैनिक १५ सयको हाराहारीमा नेपालीहरु भिजिट भिसामा मुलुक बाहिर जाने गरेका छन् । अध्यागमन विभागको तथ्यांकअनुसार यसअघिको तुलनामा अहिले मापदण्ड जारी भएसँगै भिजिट भिसामा विदेशिनेको संख्या झन्डै दोब्बरले बढेको हो ।
माघ १० अघि दैनिक करिब ९ सय ७५ नागरिक भिजिट भिसामा बाहिरिने गरेका थिए । भिजिट भिसामा नयाँ मापदण्ड लागू भएपछि अहिले दैनिक १५ सयको हाराहारीमा भिजिट भिसामा बाहिरिने गरेका विभागको तथ्यांकले जनाएको छ । नयाँ मापदण्ड लागू भएको माघ १० देखि फागुन १५ सम्मको तथ्यांक हेर्दा यसबीच ४२ हजार ६ सय २८ जना भिजिट भिसाको मुलुक बाहिर गएका छन् ।
भिजिट भिसामा नयाँ मापदण्ड सुरुहुनु अघिको एक महिनामा २९ हजार २ सय ९६ जना भिजिट भिसामा मुलुक बाहिरिएका थिए । अहिले भिजिट भिसामा नयाँ मापदण्ड सुरु भएसँगै भिजिट भिसामा विदेश जानेको संख्या बढेको अध्यागमनका कर्मचारीहरु बताउँछन् ।
यसअघि हाकिमलाई दिएको ‘स्वविवेक’ अधिकारको दुरुपयोग हुन थालेपछि गृह मन्त्रालयले नयाँ मापदण्ड जारी गरेको थियो । नयाँ मापदण्ड जारी भएपछि भिजिट भिसामा जानेको संख्या बढेको र ‘स्वविवेक’ अधिकार दिँदा बेलाबेलामा अध्यागमनका कर्मचारी माथि नै प्रश्न उठ्ने गरेकाले नयाँ मापदण्ड आएपछि विभागका कर्मचारीलाई पनि सजिलो भएको बताईएको छ ।
जानकारहरूका अनुसार भिजिट भिसा भन्नेबित्तिकै पैसाको बार्गेनिङ हुने गरेको र नयाँ मापदण्ड आएपछि पैसाको बार्गेनिङ अन्त्य भएको बताउछन । सरकारले भिजिट भिसामा यसअघिको १७ बुँदे प्रावधान हटाएर नयाँ व्यवस्था कार्यान्वयनमा ल्याएपछी नयाँ मापदण्डअनुसार भिजिट भिसामा सहज भएको बताईएको छ ।