साउदी अरबमा भएको वाफ महिला च्याम्पियनसिपको जोर्डनसंगको फाइनल खेलमा घाइते भएकी नेपाली राष्ट्रिय महिला टिमकी मिडफिल्डर प्रीति राईको घुँडाको शल्यक्रिया सफल भएको छ । घुँडाको शल्यक्रिया सफल भएपनि खेलमा फर्किन करिब तीन महिना लाग्ने भएको हो ।
चोट लागेकी राईको घुँडाको शल्यक्रिया ललितपुरको बीएन्डबी अस्पतालमा भएको थियो । ग्वार्कोस्थित बीएन्डबी अस्पतालमा डाक्टर अमित जोशी नेतृत्वको चिकित्सकको टोलीले प्रीतिको सोमबार सफल शल्यक्रिया गरेको बताईएको छ ।
ग्वार्कोस्थित बीएन्डबी अस्पतालले एक विज्ञप्ति जारी गर्दै प्रीतिको शल्यक्रिया सफल भएको र पूर्णरूपमा ठिक हुन विभिन्न कारणमा निर्भर रहने जानकारी दिएको छ । यता अखिल नेपाल फुटबल संघ (एन्फा)ले प्रीतिलाई खेलमा फर्किन करिब तीन महिना लाग्ने बताएको छ ।
राष्ट्रिय महिला टिमकी मिडफिल्डर राईले च्याम्पियनसिपको फाइनलमा जोर्डनविरुद्धको खेलमा चोटका कारण दोस्रो हाफपछि मैदान छाडेकी थिइन् । उनको दाहिने खुट्टाको घुँडामा चोट लागेको थियो ।
