जिल्ला अदालत काठमाडौँले बलात्कार मुद्दामा दोषी ठहर गरेको क्रिकेटर सन्दीप लामिछानेलाई उच्च अदालत पाटनले जेल बाहिरै बसेर मुद्दा लड्न अनुमति दिएको छ । जिल्ला अदालत काठमाडौँको फैसला बदरको माग गर्दै लामिछाने उच्च अदालत पुगेपछी उच्चले जेल बाहिरै बसेर मुद्दा लड्न अनुमति दिएको हो ।  

उच्च अदालतको आदेश पछी क्रिकेटर सन्दीप लामिछानेले जेल बाहिरै बसेर मुद्दा लड्न पाउने भएका छन् । उच्च अदालतका प्रवक्तासमेत रहेका उपरजिस्ट्रार तीर्थराज भट्टराईले लामिछानेलाई उक्त अनुमति दिएका थिए । क्रिकेटर लामिछानेले मुलुकी फौजदारी कार्यविधि संहिता ऐन २०७४ अनुसार जेल बाहिरै बसेर मुद्दा लड्ने अनुमति पाएको बताईएको छ ।

गत पुस १३ गते जिल्ला अदालतका न्यायाधीश शिशिरराज ढकालको इजलाशले सन्दिपलाई बलात्कार मुद्धामा दोषी ठहर गरेको थियो । जिल्ला अदालत काठमाडौंको फैसला बदरको माग गर्दै लामिछाने आफ्ना वकिल सरोजकृष्ण घिमिरेसहित उच्च अदालत पाटन पुगेर पुनरावेदन दिएका थिए ।

गत पुस २५ गते अदालतले लामिछानेलाई ८ वर्षको जेल सजाय र ३ लाख रुपैया जरिवानाको फैसला गरेको थियो । न्यायाधीश शिशिरराज ढकालको इजलासले लामिछानेबाट ५ लाख रुपैयाँ क्षतिपूर्ति पीडितलाई भराउनुपर्ने फैसला गरेको थियो ।