नेपालको चार धाम मध्यको एक वैद्यनाथ धाममा आजदेखि सुरु हुने कोटिहोम महायज्ञको उद्घाटन गर्न राष्ट्रपति रामचन्द्र पौडेल अछाम गएका छन् । अछामको साँफेबगर नगरपालिका १ मा रहेको वैद्यनाथ धाममा आजदेखि सुरु हुने कोटिहोम महायज्ञको उद्घाटन गर्न राष्ट्रपति पौडेल त्यसतर्फ गएका हुन् ।
आजदेखि सुरु हुने कोटिहोम महायज्ञ १४४ वर्ष पछि सुरु हुन लागेको र कोटिहोम महायज्ञ आउने शिवरात्रि सम्म चल्ने बताईएको छ । राष्ट्रपति पौडेल आउने भएकोले जिल्लाको शान्ति सुरक्षा कडा परिएको र कोटिहोम महायज्ञको तयारी पुरा भएको प्रचारप्रसार समिति संयोजक शिवबहादुर कुँवरले जानकारी दिएका छन् ।
वैद्यनाथ धाममा हरेक ६ वर्षमा लक्ष होम सहितको अर्ध कुम्भ मेला, हरेक १२ वर्षमा महालक्ष्यहोम सहितको महाकुम्भ मेला र १४४ वर्षको अन्तरमा कोटिहोम महायज्ञ सहितको महाकुम्भमेला लाग्ने गरेको छ ।
त्यसैगरी राष्ट्रपति पौडेल अछाम पुग्नुअघि बागलुङको पञ्चकोट पुग्ने र त्यहाँ हिजोदेखि सुरु भएर फागुन २३ गतेसम्म सञ्चालन हुने अनन्त श्री ब्रह्माण्डीय महायज्ञमा सहभागी हुने बताईएको छ । उक्त ब्रह्माण्डीय महायज्ञमा ५ हजार ५ सय ५५ किलोको ध्वन्यात्मक मुक्तिनाथ महाघण्टको समुद्घाटन गर्ने कार्यक्रम रहेको छ ।
