राष्ट्रिय परीक्षा बोर्डले यस वर्षको एसईई परीक्षाको प्रश्नपत्र छपाइको तयारी पुरा गरेसंगै आजबाट जनक शिक्षा सामग्री केन्द्र लिमिटेडको सेक्युरिटी प्रेसमा प्रश्नपत्र छाप्न सुरु गरिएको छ । नेपाली सेना, सशस्त्र प्रहरी र नेपाल प्रहरी गरी तीन तहको सुरक्षा घेराभित्र प्रश्नपत्र छाप्न सुरु गरिएको हो ।
आजदेखि जनक शिक्षा सामग्री केन्द्र लिमिटेडको सेक्युरिटी प्रेसमा केन्द्रका करिब ४० जना कर्मचारीले प्रश्नपत्र छाप्न सुरु गरेको बताईएको छ । एसईई परीक्षाको प्रश्नपत्र छपाइको सुरक्षाको लागी नेपाली सेनाको सेनानी (मेजर) को नेतृत्वमा ३० जना सशस्त्र र नेपाल प्रहरीका ४५ जना गरी ७५ जना सुरक्षाकर्मी खटिएका छन् ।
प्रश्नपत्र छाप्न सुरु भएसंगै अबको केही दिन सेक्युरिटी प्रेसमा सुरक्षाकर्मी र जनक शिक्षाकै सम्बन्धित कर्मचारीबाहेक अन्य कोही प्रवेश गर्न पाउने छैनन् । यस बर्ष एसईई परीक्षाको लागि ५५ लाख थान प्रश्नपत्र छपाइ हुने छ भने ५ लाख ४ हजार विद्यार्थी परिक्षामा सहभागी हुनेछन ।
