वैदेशिक रोजगारीको शिलशिलामा युएईमा क्रियाशील तामाङ समाज युएईले आयोजना गर्ने सोनाम ल्होछार तथा सेलो विशेष कार्यक्रमको तयारि पुरा भएको छ । युएईमा क्रियाशील तामाङहरुको छाता संगठन तामाङ समाज युएईको आयोजनामा हुन लागेको मन्जुश्री संवत् २८६० डुक ल्हो (मु पुख्री) सोनाम ल्होछार तथा सेलो विशेष कार्यक्रमको अन्तिम तयारी पूरा भएको हो ।

यहीँ फेब्रुअरि १० तारिकका दिन रोयल रोज होटल अबधाबी र फेब्रुअरि ११ तारिकमा युएईको विकसित शहर दुबई स्थित क्लब SK7 मा हुने कार्यक्रममा नेपालदेखि आउने अतिथि कलाकारहरु बरिस्ठ गायक तथा संगीतकार विश्व दोङ र गायिका जितु लोप्चन सांगीतिक प्रस्तुति दिने बताईएको छ ।

'तामाङ समाज युएईको शान, तामाङ संस्कृति तामाङ पहिचान' भन्ने मुल नारा लिएर लामो समयदेखि तामाङ जातिको भाषा धर्म र संस्कृति संरक्षण र प्रबर्द्धन गर्ने उदेश्यले विभिन्न साँस्कृतिक कार्यक्रमहरु आयोजना गर्दै आएको समाजले यस वर्ष पनि सोनाम ल्होछारको अवसरमा साँस्कृतिक कार्यक्रम गर्न लागेको तामाङ समाज युएईका कार्यकारी अध्यक्ष भिम दोङले जानकारी दिएका छन् ।

उक्त ल्होछार बिशेष कार्यक्रममा युएईमा रहेका स्थानीय कलाकारहरुको समेत बेजोड प्रस्तुति रहने बताईएको छ । उक्त कार्यक्रममा धेरै नेपालीहरु सहभागी भइ आफ्नो देशको कला संस्कृतिको प्रबर्द्धन गर्न टेवा पुर्याउने विश्वास आयोजकले गरेको छ ।