चौथों टाइगर कप राष्ट्रिय तथा अन्तर्राष्ट्रिय आमन्त्रित खुल्ला क्लब च्याम्पियनसिप महिला तथा पुरुष भलिबल प्रतियोगिता २०८० को सम्पूर्ण तयारी पूरा भएको छ । तयारी पूरा भएसँगै आयोजकले उद्घाटन खेलमा गण्डकी प्रदेश र नेपाल आर्मी क्लव भिड्ने जानकारी दिएको छ ।
टाइगर ग्रुप अफ पोखराको आयोजनामा यही माघ १ गतेदेखि ६ गतेसम्म हुन लागेको उक्त प्रतियोगिताको खेल तालिकाअनुसार उद्घाटन खेलमा गण्डकी र नेपाल आर्मी भिड्ने पक्का भएको हो । देशकै ठूलो धनराशी पुरस्कार भएको उक्त प्रतियोगिताको उद्घाटन खेल भोलि दिउँसो साढे १ बजे सुरु हुनेछ । प्रतियोगिताको पूर्वसन्ध्यामा आयोजित पत्रकार सम्मेलनमा गु्रपका अध्यक्ष नारायणप्रसाद शर्माले प्रतियोगितामा सहभागी हुनका लागि पोखरा रंगशालामा आउन आह्वान गरे ।
उनका अनुसार पोखरा रंगशाला भलिबल टे्रनिङ सेन्टरमा करिब दश हजार क्षमताको प्यारापिट तयार गरिएको छ । सहभागी सबै महिला तथा पुरुष टिम पोखरा आइसकेका छन् । खेल तालिकाअनुसार हरेक दिन महिला र पुरुषतर्फका २–२ खेल गरी चार खेल हुनेछ । नेपाल भलिबल संघको स्वीकृतीमा हुने चौथों टाइगर कपमा पहिलो पटक सहभागिता जनाउन भारत हरियाणा राज्यको महिला पुलिस क्लव समेत पोखरा आइपुगेको छ ।
महिलातर्फ चन्द्रगिरी नगरपालिका न्यू डायमण्ड स्पोर्टस क्लब, गण्डकी प्रदेशसँगै तीन विभागीय टोली नेपाल पुलिस क्लब, नेपाल आर्मीको त्रिभुवन क्लब र सशस्त्र प्रहरीको एपिएफ क्लबले सहभागिता जनाउने छ ।
त्यसैगरी, पुरुषतर्फ श्रीलंकाको आर्मी टिम पहिलो पटक पोखरा आएको छ । प्रतियोगितामा सहभागी हेल्प नेपाल स्पोर्टस क्लवले तीन जना पाकिस्तानी खेलाडी समेत टिममा भित्राएको छ ।पुरुषतर्फ गण्डकी प्रदेश भलिबल संघसँगै तीन विभागीय टोली नेपाली सेनाको त्रिभुवन क्लब, नेपाल पुलिस क्लब र सशस्त्र प्रहरीको एपिएफ क्लबले सहभागिता जनाउने छ ।
खेल तालिकाअनुसार लिग कम नक आउटका आधारमा सञ्चालन हुने प्रतियोगिताको पहिलो दिन माघ १ गतेदेखि ३ गतेसम्म महिला र पुरुषतर्फ दुई/दुई गरी चार खेल हुनेछ । महिलातर्फ पहिलो दिन माघ १ गते विभागीय टोली एपिएफ क्लबले नेपाल पुलिस क्लवको सामना गर्ने छ । दोस्रो खेल त्रिभुवन आर्मी क्लब र चन्द्रागिरी नगरपालिका न्यू डायमण्ड क्लबबिच हुनेछ ।
पुरुषतर्फको पहिलो खेल मध्यान्ह्रमा दुई विभागीय टोली एपिएफ क्लब र नेपाल पुलिस क्लबविच हुनेछ भने सो खेलगतै उद्घाटन खेल सुरु हुनेछ । माघ २ गते महिलातर्फ गण्डकीले नेपाल पुलिसको सामना गर्नेछ भने दोस्रो खेल महिलातर्फ त्रिभुवन आर्मी क्लब र हरियाणा टिम भारतबिच हुनेछ । त्यस्तै, पुरुषतर्फको पहिलो लिग खेल श्रीलंका आर्मी टिम र एपिएफ क्लब तथा दोस्रो खेल त्रिभुवन आर्मी र हेल्प नेपाल क्लबबिच हुने भएको छ ।
माघ ३ गते महिलातर्फ एपिएफ क्लव र गण्डकी प्रदेशबिच हुने छ भने दोस्रो खेलमा चन्द्रागिरी नगरपालिका न्यू डायमण्ड क्लबले हरियाणा पुलिस क्लवसँग सामना गर्नेछ । यता, पुरुषतर्फ सोही दिन लिग चरणको अन्तिम खेलमा नेपाल पुलिस क्लब र श्रीलंका आर्मी टिमबिच तथा दोस्रो खेलमा हेल्प नेपाल र गण्डकी प्रदेश आमनेसामने हुनेछन् । खेल तालिकाअनुसार माघ ४ गते महिला र पुरुष दुवैतर्फ सेमिफाइनलका खेल सञ्चालन हुनेछ । माघ ५ गते तेस्रो र चौथों हुने टिमको टुङ्गो लाग्नेछ ।
माघ ६ गते महिला र पुरुषतर्फ फाइनल खेल सञ्चालन हुने जनाइएको छ । प्रतियोगिताको उद्घाटन गण्डकी प्रदेशका मुख्यमन्त्री सुरेन्द्रराज पाण्डेले गर्ने तय भएको संस्थाका अध्यक्ष शर्माले जानकारी दिए । यस्तै, प्रतियोगिताका विजेता टिम (महिला र पुरुष दुवै) ले ट्रफी, मेडल तथा प्रमाणपत्रसहित सम्मानस्वरुप ५ लाख ५५ हजार ५ सय ५५ रुपैयाँ नगद पुरस्कार पाउनेछन् ।
उपविजेता टिमले २ लाख ५५ हजार ५ सय ५५ रुपैयाँ तथा तेस्रो टिमले १ लाख २५ हजार ५ सय ५५ रुपैयाँ नगद पुरस्कार प्राप्त गर्नेछन् । प्रतियोगितामा उत्कृष्ट हुने महिला तथा पुरुष खेलाडीलाई जनही २५ हजार नगद सम्मानस्वरुप प्रदान गरिनेछ । अन्य विद्यागत रुपमा उत्कृष्ट हुने खेलाडीलाई एक्सटेपको १५ हजार बराबरको गिफ्ट ह्याम्पर प्रदान गरिने आयोजकले बताएको हो ।
प्रतियोगितामा टिकट काटेर हेर्ने दर्शकलाई दैनिक गिफ्ट ह्याम्पर प्रदान गरिने पनि आयोजकले जनाएको छ । फाइनल खेलमा बम्पर उपहारस्वरुप सामसुङको मोबाइल प्रदान गरिने बताइएको छ । प्रतियोगिता सम्पन्न गर्न करिब १ करोड १५ लाख भन्दा बढी खर्च हुने आयोजकको भनाइ छ ।
