ताप्लेजुङ जिल्लाको प्रसिद्ध तीर्थस्थल पाथीभरासहित आसपास क्षेत्रमा हिमपात हुँदा स्थानीय बासिन्दा र तीर्थयात्री प्रभावित भएका छन् । हिमपात भएसँगै त्यस क्षेत्रमा चिसो अत्यधिक बढ्दा जनजीवन प्रभावित बनेको हो ।
झन्डै ३ हजार ७ सय ९४ मिटर उचाइमा अवस्थित पाथीभरा धाममा सामान्यतया हरेक वर्ष पुस देखि चैतसम्म हिमपात हुने गर्दछ । अहिले हिमात भएर चिसो निकै बढेपछि पाथीभरा जाने तीर्थयात्रुहरुको संख्यामा कमी आएको छ ।
पाथीभरा जाने मार्गको ३ हजार १ सय मिटर उचाइमा पर्ने माथिल्लो फेदीदेखि नै हिमपात भएको कारण यो बेला अरु समयमा भन्दा केही कम तीर्थयात्रीहरू आउने गरेको पाईन्छ । अहिले पाथिभरा मन्दिर क्षेत्रमा बाक्लो हिउँ परेको पाथीभरा क्षेत्र विकास समितिले बताएको छ ।
पाथीभरा क्षेत्र विकास समितिका कर्मचारी राजेन्द्र महतका अनुसार मन्दिर क्षेत्रमा बाक्लो हिउँ परेको कारण आसपासका बस्तीहरू समेत हिउँले सेताम्मे देखिएका छन् । अबका केही सातासम्म पाथीभरा क्षेत्रमा हिमपात हुने महतको भनाई छ । साथै हिमपात भएपछि बाटो चिप्लो हुने गरेकाले तीर्थयात्रुहरुको कमि हुने बताईएको छ ।