नेपाली सेनाको रिक्त रथी पदमा उपरथी अशोक सिग्देललाई सरकारले बढुवा गरेको छ । रक्षा मन्त्रालयको प्रस्ताव र जंगी अड्डाको सिफारिसमा मन्त्रिपरिषद् बैठकले उनलाई रथीमा बढुवा गरेको हो ।
उनको बढुवासँगै अब २०८१ साल भदौ २४ गतेदेखि सिग्देल नेपाली सेनाको प्रधानसेनापति बन्न सक्नेछन् । तत्कालीन बलाधिकृत रथी सरोजप्रताप राणाले ११ कात्तिकमा अवकाश पाएपछि एक रथी पद रिक्त रहेको थियो । उक्त रिक्त स्थानमा सिग्देल बढुवा भएका हुन् ।
यसअघि तत्कालीन उपरथी ताराध्वज पाण्डेलाई बढुवा गर्ने तयारी भएपनि उनको नागरिकता र शैक्षिक प्रमाणपत्रमा अलग जन्ममिति पाइएपछि जंगी अड्डाले छानबिन गरेको थियो । त्यसलगत्तै पाण्डेले कात्तिक २४ गते राजीनामा दिएका थिए ।
पाण्डे राजीनामा दिएर बाहिरिएपछि सेनाले वरीयताका आधारमा सिग्देललाई बढुवाको बाटो खुलाउने गरी सूचना निकालेको थियो ।