नक्कली शरणार्थी प्रकरणमा थुनामा रहेका पूर्व गृहमन्त्री बालकृष्ण खाँणलाई उच्च अदालत पाटनले धरौटीमा रिहा गर्न आदेश दिएपछि खाँणलाई सम्पत्ति शुद्धीकरण विभाग लगिने भएको छ । केन्द्रीय कारागार सुन्धाराले आज सम्पत्ति शुद्धीकरण विभागमा लाने तयारी गरेको हो ।
पूर्व गृहमन्त्री समेत रहेका खाँणलाई बिहिबार उच्च अदालत पाटनले ३० लाख रुपैयाँ धरौटीमा रिहा गर्न आदेश दिएको थियो । नक्कली शरणार्थी प्रकरणमा थुनामा रहेका सबै प्रतिवादीविरुद्ध सम्पत्ति शुद्धीकरण विभागमा पनि मुद्दा चलिरहेकाले उनलाई सम्पत्ति शुद्धीकरण विभाग लगिने भएको हो ।
यसअघि उच्च अदालत पाटन र जिल्ला अदालत काठमाडौँले रिहा गर्न आदेश दिएकाहरूलाई पनि सम्पत्ति शुद्धीकरण विभागमा लगिएको थियो । खाँणलाई उच्च अदालतमा ३० लाख रुपैयाँ धरौटी बुझाए सम्पत्ति शुद्धीकरण विभागमा लगिनेछ ।
विभागबाट रिहा भएपछि अख्तियार दुरुपयोग अनुसन्धान आयोग लगिने बताईएको छ । अख्तियारले तारेखमा रिहा गर्ने सम्भावना रहेको छ । नेपालीलाई भुटानी शरणार्थी बनाएर अमेरिका पठाउने भन्दै ठगी गरेको आरोपमा पूर्व गृहमन्त्री खाँणलाई ७ महिनाअघि पक्राउ गरिएको थियो ।
यसअघि उच्च अदालतकै न्यायाधीश जनकराज पाण्डे र प्रकाश खरेलबीच खाँणलाई छाड्नेबारे राय बझिदा उनि थुनामै रहेका थिए । हिजो उच्च अदालत पाटनका न्यायाधीश कृष्णराम कोइरालाको इजलासले खाँणलाई धरौटीमा छाड्न आदेश दिएको हो ।