रुकुम जिल्लाको रुकुम (पूर्व) अन्तर्गत भूमे गाउँपालिकामा फलाम खानी भएको पत्ता लागेपछि भूगर्भविद्ले गत साताबाट उत्खननको लागि सम्भाव्यता अध्ययन सुरु गरेका छन् । उत्खननको लागि खानी तथा भूगर्भ विभागका भूगर्भविद् सुजन देवकोटा र सौनक भण्डारीको समूहले भूमे –३ स्थित झुम्लाबाङमा अध्ययन सुरु गरेका हुन् ।
आर्थिक अभावको कारण उक्त क्षेत्रको विस्तृत अध्ययन अहिलेसम्म अघि बढ्न सकेको थिएन । हाल फलाम खानी पत्ता लागेको भनिएको ठाउँमा एक सय वर्षअघिसम्म तामा खानी उत्खनन हुने गरेको बताईएको छ ।
तत्कालीन समयमा तामा खानी उत्खनन गर्दा भूमे गाउँपालिकाको २, ३, ४ र ५ नम्बर वडाको विभिन्न ठाउँमा बनेका ठूला खाडल र सुरुङ अहिले पनि देख्न सकिने भूमे गाउँपालिकाका अध्यक्ष होमप्रकाश श्रेष्ठले बताए । उनले गाउँपालिकाको विभिन्न क्षेत्रमा फलाम खानीको बारेमा अध्ययन सुरु भएको बताएका छन् ।
गत साल गरिएको अध्ययनबाट झुम्लाबाङमा फलाम खानी भएको पत्ता लागेको र रुकुम पूर्वमा हालसम्म खानी तथा भूगर्भ विभागमले फलाम र तामा खानीको बारेमा तीन पटक अध्ययन गरेको पनि अध्यक्ष श्रेष्ठले जानकारी दिएका छन् ।
