काठमाडौं महानगरका मेयर विद्या सुन्दर शाक्यले फुइकी त हाँके तर सय दिनमा के के न गर्छु भन्ने उनको हुँकारले माखो पनि मार्न सकेन । उनले गरेको काम भनेको बृद्धभत्ता वितरणबाहेक केही पनि गर्न सकेनन् । तैपनि कार्यकालको सय दिन पुगेको अवसरमा लामो वक्तव्य निकालेर महानगरवासीको आँखामा छारो हाल्ने कामचाहिं गरेको देखियो । उनले राष्ट्रिय सभागृहमै पत्रकार सम्मेलन गरेर चुनावका बेलामा गरेका बाचा कबुलहरु पूरा गर्ने प्रयास गरिरहेको बताएका छन् । उनले क्लिन द सिटी, ग्रिन द सिटी बनाउने, विद्युत आपूर्ति सहज, धुवारहित सडक, अपांगता मैत्री भवन, सामाजिक कार्यहरु गरिरहेको र कानुनले दिएको अधिकारको उपयोग गरेको बताए । जब कि यतिबेला राजधानीमा फोहर उठ्न नसकेर गनाइरहेको छ । नाकमुख थुनेर हिड्नुपर्ने बाध्यता छ । तैपनि लाज पचाएर मेयरले काम गरेको र सुधार भइरहेको बताए । चुनावबेलामा ट्राफिक जाम हटाउन म आफै सडकमा उभिन्छुसम्म भनेका थिए । जबकि राजधानीको ट्राफिक व्यवस्था यति अस्तव्यस्त छ कि मेयरले महानगरको बजेट हेर्ने र भ्रष्टाचारीहरुसँग साँठगाँठ गर्नेबाहेक देखिने र जनपयोगी एउटा पनि काम गर्न सकेको देखिदैन ।यिनैले हो स्मार्ट सिटीको परिकल्पनासमेत गरेको । मनोरेलको सपना पनि देखाएका एि । हरेक वडामा हेल्पडेस्क राख्ने र सिसिटीभी जडान गर्ने तथा सडकमा ढल व्यवस्थापन गर्ने कुरा गरेका छन् । तर स्थिति यस्तो छ कि कुनै पनि वडामा बिना घूस काम हुन छाडेको छ । सेवाग्राहीहरु कर्मचारीले चलाएको निकायभन्दा पनि आतंकित हुनथालिसकेका छन् । जनप्रतिनिधिले सञ्चालन गरेको स्थानीय निकाय त जनमैत्री हुनपर्ने होइन र ?
पत्रकारहरुले यति धेरै प्रश्न गरे कि नैतिक सीमाबाट भाग्नका लागि मेयर विद्या सुन्दरले आफूले प्रतिवद्धता व्इक्त गरेका काम स्थानीय निकायबाट हुन नसक्नुमा केन्द्रबाटै परिचालन भइरहेकाले हो भनेर उम्किए । साविककै कानुनअनुसार काम गर्नुपर्ने बाध्यता छ, संघीय संविधानअनुसार स्थानीय निकाय अधिकार सम्पन्न भइसकेको छैन, त्यसैले केही समय लाग्छ । विद्या सुन्दरका भद्दा तर्कले पत्रकारहरु सन्तुष्ट भएनन्, सय दिनको हिसावकिताव सकेर मेयर विद्या सुन्दर शाक्य कुलेलम ठोके । सामाखुशीको नालामा खसेर ढलबाट बग्दै बाँच्न सफल सत्या सापकोटालाई १ लाखको विमा र १० हजार दिएको र तारकेस्वरको नालामा खसेर मृत्यु भएकी बिनिता फुयाँलको परिवारलाई २५ हजार आर्थिक सहयोग दिएको बताउने शाक्यले आइन्दा यस्तो दुर्घटना हुनेछैन भनेर आश्वस्त पार्न सकेनन् । सय दिनमै मेयर विद्या सुन्दर शाक्य असफल भएका छन्, अव के गर्लान् ?
