७१औं जन्मदिन मनाइरहेका पूर्वराजाले सबैले सुन्नेगरी देश जोगियोस् भनेका छन् । बिग्रह बिखण्डनतिर नलागी देश सुदृढ राष्ट्रिय एकतातर्फ अग्रसर रहोस् भन्ने आफ्नो मनोकांक्षा प्रकट गरेका छन् । र, पूर्वराजाले ‘यस्तो भावना आम नेपालीमा र खासगरी राष्ट्रका जिम्मेवार जनप्रतिनिधिहरुमा रहोस् यही नै मेरो आग्रह छ समेत भनेका छन् । पूर्वराजाको यो सदासयता प्रशंसनीय छ । तर प्रश्न उठ्छ, देश विग्रह र बिखण्डनतिर गइसक्यो त ? देश जोगियोस् भनेर चिन्ता प्रकट गर्ने बेला भइसक्यो त ? पूर्वराजाले जे संकेत गरेका छन्, जे खतरा देखेका छन्, त्यो खतरा गम्भीर भइसकेको हो भने अव आमजनताले सुन्ने र पूर्वराजलो सन्देशमात्र दिएर पुग्दैन । देश साझा हो, देश हाम्रो हो, देश छ र हामी छौं त्यसैले हामी सबैको प्रयास देशलाई बिग्रह र बिखण्डनबाट बचाउन र देश जोगाउन आआफ्ना क्षेत्रबाट सक्दो भूमिका देखिने गरी निर्वाह गर्न जरुरी छ ।

पूर्वराजाले आफ्नो अभिव्यक्तिमा पूर्वीय दर्शनले विश्वलाई आकर्षित गरिरहेको बेलामा हामी भने कस्तूरी हराएको मृग झैं शून्यतामा हराइरहेको भन्दै हामी क्रियाशील उर्जा बोकेर ब्युँतन अब ढिला गर्नु हुँदैन समेत भनेका छन् । पूर्वराजालाई थाहा छ– आमनागरिक नेतृत्व विहीन छन् । त्यसैले पूर्वराजा जता जान्छन् उतै आमनागरिक झुम्मिने गरेका छन् । जो राजनीतिमा छन् तिनले आमनागरिकको अपेक्षा र विश्वासलाई कायम राख्न सकेनन् । त्यसको प्रमाण भर्खर सम्पन्न भएको स्थानीय तहको दुईचरणको निर्वाचनले पनि देखाएको छ । यति बुझिसकेपछि पूर्वराजा स्वयम्ले देश बचाउने र बिखण्डनको चक्रव्यूहबाट देशलाई जोगाउने अभियानको नेतृत्व किन नगर्ने ? पूर्वराजाको चिन्ता र चासो भनेको देश हो । देश हो भने देशका लागि पूर्वराजा सहमति र सहकार्यको थालनी गर्न गराउन मौलो बन्न सक्छन् । पूर्वराजा अघि सर्ने हो भने अपजसजति राजतन्त्रतिर फालेर पानीमाथिको ओभानो बन्नेहरु पनि सचेत हुनेछन् । देशभन्दा व्यक्ति अथवा व्यक्तिगत राजनीति ठूलो होइन । पूर्वराजाले अव अघि सर्ने सन्देश त दिएका छन्, आमनागरिक पूर्वराजा अघि सर्दा अहिले देखिएका बिकृति र विसंगतिको अन्त्य र जिम्मेवार राजनीतिको सुरुआतको आशा समेत गर्न थालिसकेका छन् । पूर्वराजा– देश जोगियोस्, बिग्रह र बिखण्डनको नाश होस् ।