नेपालका लागि जापानी राजदूत मायदा तोरूले राष्ट्रियसभाका अध्यक्ष नारायणप्रसाद दाहालसँग शिष्टाचार भेट गरेका छन् । राजदूत तोरूले सिंहदरबारस्थित अध्यक्ष दाहालको कार्यकक्षमा शिष्टाचार भेट गरेका हुन् ।
शिष्टाचार भेटमा द्विपक्षीयसम्बन्ध, आपसी हित र सहकार्यलगायत बारेमा विचारविमर्श भएको बताइएकाे छ । अध्यक्ष दाहालले नेपाल–जापानसम्बन्ध निकै पुरानो र घनिष्ट रहेको बताउँदै आगामी दिनमा दुई देशबीचको सम्बन्ध अझ मजबुत र प्रगाढ हुनेमा राजदूत तोरूको भूमिका महत्वपूर्ण रहने विश्वास व्यक्त गरेका थिए ।
त्यस्तै नेपालको संघीय संसद्मा नेपाल–जापान संसदीय मैत्री समूह गठन गरिएको उल्लेख गर्दै अध्यक्ष दाहालले संसदीय मैत्री समूहले दुई देशबीचको संसदीय सम्बन्ध, अनुभव आदानप्रदान र भ्रमण आदानप्रदान गर्न सहज हुने बताए ।
भेटका अवसरमा राजदूतले ताेरूले जापान–नेपालसम्बन्धलाई थप प्रगाढ बनाउन आफू निरन्तर लाग्ने बताएकाे अध्यक्ष दाहालको सचिवालयले जनाएको छ ।
