यहि सोमबारदेखि लागु हुनेगरी बागमती प्रदेश सरकारले सरकारी कार्यालयमा तीन भाषा प्रयोगमा ल्याउने भएको छ । सोमबारदेखि नेपाली भाषा, नेपाल भाषा(नेवारी) र तामाङ भाषालाई सरकारी कामकाजको भाषाका रूपमा प्रयोग ल्याइने भएको हो ।
यसभन्दा अघि नेपाली भाषा मात्र सरकारी कार्यालयमा प्रयोग हुँदै आएकोथियो । भोलि सोमबार काठमाडौँमा प्रधानमन्त्री पुष्पकमल दाहालले यसको औपचारिक घोषणा गर्ने कार्यक्रम रहेको बागमती प्रदेश सरकारले जानकारी दिएको छ ।
सरकारले नेवारी र तामाङ भाषालाई सरकारी कार्यालयमा औपचारिक रूपमा सुरुवात गर्न लागेको बताईएको छ । तीन भाषा एकैसाथ प्रयोग हुन लागेको खुसीयालीमा प्रदेश सरकारले आफू मातहताका सरकारी कार्यालयमा बिदा दिने निर्णय समेत गरेको छ ।
प्रदेशमा नेपाली भाषा बाहेक अन्य भाषालाई कामकाजी भाषाको रूपमा प्रयोग गर्न लागिएको यो पहिलो पटक हो । तीन भाषा एकैसाथ सरकारी कामकाजी भाषाका रूपमा लागु गर्न सोमबार बिहान काठमाडौँको वसन्तपुरमा औपचारिक घोषणाको तयारि गरिएको छ ।
